సాలూరులో పొలిటికల్ ట్విస్ట్.. పదవి కోసం హడావుడిగా ప్రేమ పెళ్లి.. పొత్తుల రాజకీయంతో టీడీపీ నేత ఆశలు ఆవిరి!

ఏపీలో స్థానిక సంస్థల ఎన్నికల వేడి తారస్థాయికి చేరింది. నామినేషన్ల గడువు సమీపిస్తుండటంతో టికెట్ల కోసం ఆశావహులు తీవ్రంగా ప్రయత్నిస్తున్నారు. ఈ క్రమంలో పార్వతీపురం మన్యం జిల్లా సాలూరులో జరిగిన ఓ 'పొలిటికల్ పెళ్లి' ఇప్పుడు రాష్ట్రవ్యాప్తంగా హాట్ టాపిక్‌గా మారింది. మున్సిపల్ ఛైర్మన్ పదవిని దక్కించుకోవాలనే ఆశతో ఓ యువ నేత హడావుడిగా పెళ్లి చేసుకున్నా, పొత్తుల రాజకీయం అతడి ఆశలపై నీళ్లు చల్లింది.

ఏం జరిగిందంటే?
సాలూరుకు చెందిన టీడీపీ యువ నేత, మాజీ కౌన్సిలర్ వైకుంఠపు హర్షవర్ధన్‌కు రాజకీయంగా మంచి పట్టుంది. అతడి తండ్రి వైకుంఠపు పంచముఖి కూడా గతంలో కౌన్సిలర్‌గా పనిచేశారు. దీంతో ఈసారి మున్సిపల్ ఛైర్మన్ పదవి తనకే దక్కుతుందని హర్షవర్ధన్ ధీమాతో ఉన్నారు. 

అయితే, ప్రభుత్వం ప్రకటించిన రిజర్వేషన్లతో సీన్ మొత్తం మారిపోయింది. సాలూరు మున్సిపల్ ఛైర్‌పర్సన్ స్థానాన్ని బీసీ మహిళకు కేటాయించారు. దీంతో అతడికి ప్రత్యక్షంగా పోటీ చేసే అవకాశం లేకుండా పోయింది.

అయినా పట్టు వదలకుండా, పదవిని తమ కుటుంబానికే దక్కించుకోవాలని హర్షవర్ధన్ ఓ కీలక నిర్ణయం తీసుకున్నారు. తాను ఎనిమిదేళ్లుగా ప్రేమిస్తున్న గుళ్ల మంజీరాను వెంటనే పెళ్లి చేసుకోవాలని నిశ్చయించుకున్నారు. వాస్తవానికి మరో ఆరు నెలల్లో వీరి పెళ్లి జరగాల్సి ఉంది. 

కానీ, రిజర్వేషన్ సమీకరణాలను తనకు అనుకూలంగా మార్చుకునేందుకు, ముహూర్తాలు కూడా చూడకుండా, బంధువులను సైతం పిలవకుండా హడావుడిగా మంజీరా మెడలో తాళి కట్టారు. తన భార్య ద్వారా ఎలాగైనా ఛైర్‌పర్సన్ టికెట్ సాధించి, పరోక్షంగా పీఠాన్ని దక్కించుకోవాలని ప్లాన్ చేశారు.

కూటమి దెబ్బతో నిరాశ
హర్షవర్ధన్ ప్రణాళిక బాగానే ఉన్నా, రాజకీయ పరిణామాలు ఆయనకు అనుకూలించలేదు. టీడీపీ-జనసేన కూటమి పొత్తుల సర్దుబాటులో భాగంగా, ఆయన ఆశలు పెట్టుకున్న సాలూరు మున్సిపల్ ఛైర్‌పర్సన్ స్థానాన్ని జనసేన పార్టీకి కేటాయించారు. ఎన్నో ఆశలతో, అత్యంత వేగంగా పెళ్లి చేసుకున్న హర్షవర్ధన్‌కు ఈ పరిణామం తీవ్ర నిరాశను మిగిల్చింది. 

మంత్రి గుమ్మిడి సంధ్యారాణికి విధేయుడిగా, బలమైన సామాజిక వర్గం అండ ఉన్నా, పొత్తుల రాజకీయం ముందు అతడి వ్యూహం ఫలించలేదు. పదవి కోసం ప్రేమను, పెళ్లిని ఉపయోగించుకోవాలనుకున్న యువ నేత టికెట్ కథ ఇలా ఊహించ‌ని విధంగా ముగియడం స్థానిక రాజకీయాల్లో చర్చనీయాంశమైంది.